昨晚非常無聊, 極度渴望想找個blog tag玩, 見到有個blog tag的題目是「我的十個冬天回憶」, 現在談冬天太早了吧, 要我寫十個或許太多, 所以改一改題目為「我的五個夏天回憶」, 正好切合現在炎熱的六月~

玩法如下:

請寫下五項夏天的回憶與大家分享, 完成後請再踢三位blog友參加 (見到有興趣自己踢自己都得!)

1./ 游水

夏天既回憶一定有沙灘! 以前細個成日同屋企人去深/淺水灣游水, 仲記得讀幼稚園時用水泡游到海中心, 四舅母同我玩, 將我個頭一手浸落水度, 第一次感覺到好驚, 個鼻好痛, 對眼又澀好辛苦

大到初中時入左校隊, 成日暑期要練水, 一個塘兩個塘三個塘咁游, 游左一季頂唔順放棄左...(怎麼全都是痛苦的回憶?)

2./ 小強

話說小學的時候屋企裝修, 我就去左大姨屋企暫住, 記得有晚半夜無神神醒左, 見到訓我隔離既大姨隻腳指公有點黑色的東西孺動, 再望真d係隻強壯既阿強! 嚇得我好驚好驚, 成晚係咁用被包到自己實一實好怕阿強爬上我度, 自此驚左...

又有年讀中學的夏天, 夜晚全屋訓淨我同阿妹未訓, 突然從窗外飛黎一隻大強, 嚇到我同阿妹死死下, 最後因為太驚又叫唔醒爸爸, 阿媽又話我地發神經, 我同阿妹半夜執包袱去左住隔離棟既阿姨屋企宿一宵...(牛姨, 你記得嗎? 我同你抗戰既日子實在太多太難忘啦, 哈哈)

3./ 水鞋

小學時阿媽唔比擔遮, 要我地著雨褸著水鞋返學, 還記得那時件雨褸好短身去到膝頭, 著住對短身闊口的黃色水鞋, 雨一直下, 雨水隨著雨褸sir落對水鞋入面. 返到學校著襪換鞋後, 在班房傳來陣陣「咸魚味」, 被某姓陸的男同學發現, 全班笑聲不絕

4./ 小學畢業營

小六的暑假非常傷感, 因為要畢業了. 畢業營在新建的西貢戶外康樂營, 不捨得同學們, 更不捨得當年喜歡的男同學. 記得日頭不停同同學影相周圍玩, 那一夜和幾位女同學在房裡傾心事, 傾到半夜也不肯訓. 直到乘校車回家的那一刻, 還未敢和心儀的男同學上前說句話交換電話, 怕羞累事...

5./ 執子之手

我都算遲熟, 中五暑假那年才算是第一次「真正」談戀愛. 暑期工認識了一位男仔, 完完全全係我既dream type, 可惜那段戀情帶給我無限的苦澀. 那次之後覺得拍拖真係一件很笨的事, 要我單對單同一個人拍拖咁悶, 非常唔甘心, 倒不如一晚走幾場, 鐘意同下呢個, 鐘意又同下果個去玩仲自由仲有新鮮感 (反正唔係我既人, 我同其他男人點玩都無權管)

不過亦多得條粉腸, 我先知道咩係真愛. 廿四歲那年的生日, 哲爸向我求婚了, 算是長久以來最甜蜜最難忘的一個夏天吧

6./ 童軍露營的日子 (於jun 22後加)

keith的五個夏天回憶中, 看到自己也曾有過難忘的回憶. 記得小時參加童軍, 經常和隊友背著營具攀山露營. 雪冰了後用報紙包裹著的保礦力, 露營專用的爐具餐具, 下著大雨仍要抓緊石壁向上爬, 好幾次以為自己快要不行了, 經隊長的鼓勵又再出力向上爬

上到山峰, 大家分工合作, 男的扎營, 女的煮食, 雖然天熱但野外不便沖涼, 要用爽身粉洗頭, 用溪水抺身. 最喜歡玩野外定向, 記得有次和另外一位女隊員結隊, 就快完成所有站回終點時, 冷不防被其他隊玩突擊, 搶了我們的旗仔; 記得晚上camp fire完後, 大伙兒躺在草地上看星星; 最難忘就是有位男人頭的女隊員將自己的內衣褲周圍放, 隊長早操完入營檢查, 一打開帳篷就見到五顏六色的內衣褲, 好惹笑 XDDDD

 

好了, 自爆完畢. 接下來邊個同我有仇要佢自爆好呢...?

koko, jojit, sara, 請接棒!

(講笑講笑, 其實係你地寫blog最密可以接棒就真, 同我地分享下你地既五個夏天的回憶啦~)

arrow
arrow
    全站熱搜

    Maggie 發表在 痞客邦 留言(0) 人氣()